Sipek, enn ti garson ki pa tro kontan Nwel.
Sak lafin lane, li kone ki li pa pou gagn enn zoli kado. So mama ek so papa travay dir me bien rar zot resi fer Sipek plezir. E sa lane-la, avek lasesres, rekolt legim finn bien mins. Alor, Sipek pa pe atann gran zafer.
Sipek ena de larme sek, Tibidou ek Koustik. Enn zour, Sipek ti montre zot enn let ki li ti ekrir pou Bolom Nwel me zame li pa finn avoye. Alor, san ki Sipek kone, Tibidou ek Koustik desid pou avoy let-la.
Enn gramatin, Sipek tann laklos fakter. Ler li sorti, li gagn enn gro lanvlop rouz avek so nom ekrir an-or. Li etone me li kirye pou kone seki ena ladan. Li galoupe pou al montre sa Tibidou ek Koustik. Kan zot trouv lanvlop rouz, zot rakont Sipek seki zot finn fer.
Sipek ouver lanvlop ek trouv enn lalis dis kiksoz ki li bizin fer avan le 24 swar pou so rev realize. Nou trwa konper bien exsite pou al fer lavantir-la ansam.
«Premie-la dilo-disik ! Bizin kas 5 fey fouzer ek 5 fler ibiskis. Lor ti kolinn laba pou gagne !» Sipek dir.
Deziem, bizin 5 koki diferan groser. Koustik kriye : «Anou al Grand-Gaube kot mo parin, ena plin laba !»
Bann zour pase ek Sipek resi fer sak kiksoz ki ena lor so lalis ; ekrir nom 10 dimounn ki li kontan, desinn so lekol… Si ena fasil, lezot bizin inpe limazinasion ek zefor. Rezman Sipek ena so de partner !
Le 24 gramatin, res enn dernie defi. Bizin al rod 5 leksi bien rouz, enn zanana bien mir ek 5 gato-pima.
Ayo ! Kouma pou gagn sa ?
Zot fer lespri travay.
Enn kout, Tibidou propoze : «Anou kas nou bwat kondane !»
Enn zoli lide !
Tras-trase, zot resi gagn Rs 108. Deswit, direksion lafwar.
Sipek soulaze ek so leker kontan parski anfin li pou gagn enn gro kado. Li met tou dan enn bwat ek depoz li anba sapin kouma Bolom Nwel ti demande.
Landemin, kouma Sipek leve, li al direk kot sapin. Abe, kot so gro kado ? Pourtan li’nn resi so mision ! Sipek desi, li bien tris. So mama trouv li pe plore ek Sipek rakont li seki finn pase. Li dir Sipek get dan so bwat. Sipek pa pe konpran me li tir enn par enn.
«Kifer Bolom Nwel finn donn twa sa mision-la dapre twa ?» Sipek reflesi. Tigit-tigit li konpran ki tou seki dan bwat-la ena boukou valer ek rann li ere.
Li fer enn gran sourir, li dir : «Mo pa bizin pli gro kado ki sa. Mo deza ena tou sa zoli kado-la dan mo lavi. Mo pe al ekrir Bolom Nwel pou dir li mersi.»
Enn ti mo lor loter
Francesca Jhabeemissur-Ducasse enn ansegnan kreol morisien ek li ena enn blog souper kot ou kapav lir so bann text lakrem-sokola (http://bit.ly/2g97W3B). Avek so plim ou gagn gidi-gidi ! Linn aksepte partisip a sa lide 5-Plus-la ek linn kre enn kont Nwel pou bann tipti ek bann gran dan nou langaz. Gras a li ek so limazinasion, viv enn moman mazik avek Sipek ek so bann kamwad.